Prej 4 ditësh në pyllin Pishopro të Fierit vijojnë të jenë aktive vatrat e zjarrit duke shkaktuar djegien e sipërfaqeve të mëdha të tokës në zonën e mbrojtur.
Zona e vështirë ka bërë që zjarrfikësit të kërkojnë ndërhyrje nga ajri. Mbi 60 zjarrfikës me 3 mjete zjarrfikëse dhe efektivë të Forcave të Armatosura janë në luftë me shuarjen e flakëve.
Ndërkohë, dje rreth orës 16:00, për shkak të pamundësisë për të operuar më thellë, trupat e Forcave të Armatosura u tërhoqën.
Por, rreth orës 18:00, për shkak të shtimit të intesitetit të erës situata e zjarrit doli jashtë kontrollit.
Në këto kushte, duke vlerësuar rreziqet e mundshme u kërkua angazhimi i shërbimeve të MZSH nga Lushnja, Divjaka, Patosi, dhe Roskoveci.
Në total, 8 mjete dhe 45 efektivët operuan në terren deri në orën 24:00. Më pas, 5 mjete zjarrfikëse dhe efektivët e tyre u tërhoqën për pamundësi ndërhyrjeje.
Për monitorimin e situatës qëndruan për gjatë gjithë natës, pranë zonave të banuara, tre mjete zjarrfikëse me efektivët përkatës.
