Procesi i regjistrimit të emigrantëve për zgjedhjet e ardhshme të 11 majit ka hyrë në orën e tij të 20-të dhe deri më tani janë regjistruar 2613 aplikime online në Komisionin Qendror të Zgjedhjeve (KQZ).
Nga këto, 145 kërkesa janë pranuar, 59 janë refuzuar, ndërsa pjesa tjetër vazhdojnë të jenë në shqyrtim.
Në këtë fazë të parë, shumica e aplikuesve janë burra (76.6%), kryesisht të moshës 25-45 vjeç (60%). Shtetet me numrin më të lartë të aplikimeve janë Italia, e ndjekur nga Gjermania, Anglia, Greqia dhe Shtetet e Bashkuara. Sa i përket qarqeve të regjistrimit, dominon Tirana, e ndjekur nga Durrësi, Fieri dhe Vlora.
Stafi i KQZ-së po punon me tre turne për të përshpejtuar shqyrtimin e aplikimeve, duke informuar aplikantët për statusin e tyre, qoftë në rast pranimi apo refuzimi.
Afati për aplikime do të jetë i hapur deri më 4 mars 2025, duke i dhënë mundësi shqiptarëve të Diasporës të regjistrohen dhe të përfshihen në procesin zgjedhor të 11 majit.
