Kur nuk ka një marrëveshje mes faktorit politik brenda vendit gjithmonë është parë e nevojshme futja e faktorit ndërkombëtar në punët e Shqipërisë.
Dje pas darkës mes Ramës dhe Metës janë zhvilluar takime jo pak të rëndësishme në Tiranë. Ambasadori i SHBA-së në Tiranë, Donald Lu, i shoqëruar nga Ndihmës Sekretari për Çështjet e Trafikut Ndërkombëtar të Narkotikëve, Aleksandër Arvizu, ka hyrë në ambientet se selisë së PD-së ku është takuar me kryetarin Lulzim Basha.
Besohet, edhe sipas burimeve pranë PD-së dhe qeverisë se ky takim ka sjellë një marrëveshje për të dalë opozita nga çadra deri në fund të kësaj jave. Nuk mësohet nëse është diskutuar ngritja e një qeverie teknike siç kërkon kreu i PD-së Lulzim Basha, i cili është edhe një kusht i vendosur nga demokratët për të dalë nga çadra e vendosur në Bulevardin “Dëshmorët e Kombit” për më shumë se një muaj e gjysëm.
Lu dhe Arvizu u janë vetëofruar Bashës si negociatorë për krizën që ka mbërthyer vendin. Ata janë shprehur se janë gati të marrin rolin e ndërmjetësueve në zgjidhjen e krizës politike, çka tregon së në këtë mes palët do të dalin të vetkënaqura.
Ngjarjet e fundit politike lënë të kuptohet se çadra do të hiqet dhe të gjithë të faktorët politikë do të dalin të kënaqur dikush më shumë e dikush më pak.
Partia Demokratike pas takimit kanë dalë me një deklaratë shtypi ku si zgjidhje sheh Qeverinë Teknike. Sipas tyre: “Kjo qeveri nuk ka as vullnetin dhe as mundësinë të bëjë zgjedhje të lira dhe të ndershme; Qeveria teknike rruga e vetme për zgjedhje të lira dhe të ndershme”.
Sipas zyrës së shtypit, kryetari i opozitës vuri në dukje se raportet e qeverisë amerikane dhe të Bashkimit Europian janë konfirmim i kriminalizimit dhe kapjes së shtetit nga krimi, që Partia Demokratike ka paralajmëruar këto vite si rrezikun kryesor që i kanoset politikës, ekonomisë dhe të ardhmes së Shqipërisë.
“Interesi i tij dhe i bashkëpunëtorëve të tij është ruajtja e pushtetit me çdo kusht. Në këto kushte, rruga e vetme për të siguruar zgjedhje të lira është krijimi i një qeverie teknike, me një mandat të qartë për zbatimin e menjëhershëm të ligjit të dekriminalizimit, parandalimin e rikanabizimit të vendit dhe luftën kundër drogës dhe parave të drogës, si dhe organizimin e zgjedhjeve të lira e të ndershme, theksoi kryetari i opozitës në takimin me zyrtarët e lartë amerikanë”, thuhet në deklaratën e PD-së.
