Shqipëria është zyrtarisht një republikë parlamentare, por me një pretendent për fronin mbretëror, Leka Zogun II. Ndryshe nga disa vite më parë, ai është tërhequr thuajse nga jeta publike, dhe dasma e tij në Pallatin e Brigadave, ngjalli me shumë vëmendjen e shtypit të huaj, se sa të shqiptarëve të zakonshëm.
Në kulmin e ngjarjeve dramatike të vitit 1997, i ati Leka Zogu I, mbërriti në Shqipëri, në kuadër të një referendumi për llojin e sistemit të qeverisjes. KQZ shpalli humbjen e monarkisë, në favor të së cilës kishin votuar vetëm 36 për qind e votuesve.
Ndërkohë Zogu pretendoi se kishte fituar mbi 50 për qind të votave, por rezultati ishte manipuluar nga dy partitë e mëdha.
Me këtë bindje ai i priu mijëra mbështetësve nga Sheshi Skënderbej para selisë së KQZ-së, i veshur me rroba ushtarake dhe i armatosur.
Armë kishin me vete edhe dhjetëra mbështetës, dhe këmbëngulja për të hyrë më forcë në godinë, shkaktoi një përplasje me forcat e policisë, nga e cila mbeti i vrarë 1 person, dhe u plagosën disa të tjerë.
Ky incident në kulmin e një situate kaotike, e diskreditoi figurën e Leka Zogut, që u largua nga vendi pak javë më vonë. Nipi i Ahmet Zogut, Skënder Zogu, do të deklaronte më vonë se Leka ra në kurthin e Fatos Nanos dhe Sali Berishës.
Ky i fundit e pranoi se referendumi ishte i manipuluar, vetëm kur kaloi zyrtarisht në opozitë, ndërsa më vonë e ka përdorur çështjen e monarkisë dhe figurën e Ahmet Zogut për konsum politik, sa herë i është dashur të shmangë vëmendjen nga ndonjë skandal qeveritar.
Përgatiti Tirana Today
