Teksa nga njëra anë, një pjesë e demokratëve i janë drejtuar kutive të votimit, Sali Berisha ka bërë të ditur që kryesia e PD do të mblidhet në fillmit të gushtit.
Lajmi u bë nga krahu i djathtë i liderit historik, deputeti Flamur Noka, në cilësinë e sekretarit të Përgjithshëm. Mbledhja e kryesuar nga kryedemokrati Sali Berisha është parashikuar që të nisë në orën 12:30 në seli e PD-së. Në mbledhjen e Kryesisë do të bëhet një analizë e procesit zgjedhor të 14 majit.
Edhe pse disa herë në daljet e tij për media ka theksuar nevojën për një reformim të thellë të partisë dhe ka lënë të hapur opsionin e largimit nga kreu i PD, Berisha i ka bërë ‘bisht’, duke shtyrë marrjen e përgjegjësisë.
Bashkë me besnikët e tij më të ngushtë, prej tre muajsh po kërkojnë alibi të reja të justifikuar humbjen, duke i konsideruar zgjedhjet të manipuluara nga mazhoranca aktuale. Sipas tij, humbja ndodhi për shkak të presioneve, parave dhe bandave kriminale, të dirigjuara nga kreu i qeverisë Edi Rama.
“Kam bërë një betim në 1991. Që zgjedhjet që do të humbas, do të largohem nga politika. Në rastin e parë që ka ndodhur, në 2013 kam thënë ‘goodbye’. Në këtë kontekst të harroj kush se unë mund të tërhiqem, përveç votës së demokratëve, nga situata të tjera, përballë krimit”, është shprehur Berisha më 17 Maj, tre ditë pas zgjedhjeve.
