Narkotrafikanti shqiptar Dorian Petoku i dënuar me 12 vite burg në Itali, është arratisur nga qendra e rikuperimit të Nolës në provincën e Napolit, ku ishte transferuar me çertifikatë mjekësore. 34 vjeçari ndodhej në qendrën e të të varurve nga droga pas një viti të kaluar në burg.
I ekstraduar nga Shqipëria, Petoku qëndroi rreth një vit në burg dhe më pas siguroi transferimin në qendër me byzylyk elektronik, pasi konsiderohej si narkoman. Arratisja ndodhi javën e kaluar. Në korrik 2022, Petoku u dënua me 12 vjet burg si pjesë e një organizate kriminale të trafikut të drogës.
Ai u akuzua se furnizonte me drogë organizatën e drejtuar më parë nga Fabrizio Piscitelli, i njohur ndryshe si ‘Diaboliku’. Ky i fundit u vra më 7 gusht 2019 me një plumb në kokë. Pas vrasjes së ish kreut, 34 vjeçari zgjeroi në mënyrë dramatike ‘biznesin’ dhe pushtetin së bashku me kushëririn e tij Arben Zogun.
