Kryetari i Partisë Demokratike, Lulzim Basha, zhvilloi sot një takim me sipërmarrësit e vegjël në Laprakë, ku prezantoi programin në mbështetje të tyre, duke u ofruar lehtësim në infrastrukturë po ashtu edhe me politika fiskale.
Sipas Bashës, lufta kundër monopoleve dhe korrupsionit do t’i japë biznesit frymëmarrjen për të cilën ka nevojë dhe mundësi të jashtëzakonshme për zhvillim.
Kryedemokrati, ka siguruar sipërmarrësit se programi i partisë që ai drejton është pranë shqetësimeve të tyre, duke ju ofruar zgjidhet që ata presin për të ndërtuar një të ardhme më të mirë për shqiptarët.
“Dëgjova me vëmendje sipërmarrësit e vegjël të Laprakës. Ata ka nevojë për një politikë që është në shërbim të tyre, kanë nevojë për një qeverisje që jua lehtëson punën, si me lehtësira në infrastrukturë ashtu edhe me politika fiskale.
Ne jemi në krah të çdo sipërmarrësi të ndershëm dhe po punojme intensivisht për programin e Partisë Demokratike në mbështetje të biznesit, për të krijuar alternativën e re ekonomike për Shqiperinë. Ne jemi të bindur se lufta kundër monopoleve dhe korrupsionit do të çlirojë energji pozitive në ekonomi dhe do ti japë biznesit frymëmarrjen për të cilën ka nevojë dhe mundësi të jashtëzakonshme për zhvillim.
Dhe do të jemi përditë me qytetarët dhe sipërmarrësit, sa më pranë shqetësimeve të tyre, për tju ofruar atyre zgjidhjet që presin nga ne, për të ndërtuar bashkë një të ardhme më të mirë për gjithë shqiptaret”, shkruan Basha
