Policia e Krujës ka shoqëruar tre persona për atentatin e ndodhur pas mesnatës në Larushk të Krujës, ku mbeti i vrarë Ramazan Sino si dhe u plagosën dy fëmijët e mitur të Gentian Bejtjas, i cili ishte shënjestër e atentatit.
Sipas njoftimit të Policisë mësohet se efektivët kanë ushtruar kontrolle në tre banesa në afërsi të asaj zone, si dhe janë shoqëruar në Komisariat 3 persona pasi dyshohet se mund të kenë dijeni për ngjarjen.
Ngjarja e rëndë ndodhi pak pas mesnatës në Larushk të Krujës, ku mbeti i vrarë Ramazan Sino, 29 vjeç dhe u plagosën dy nipat e tij , Alvi Bejtja 13 vjeç dhe vëllai i tij 10-vjeçar, dy fëmijët e ish-policit Gentjan Bejtja.
Dyshohet se shënjestër e atentatit ka qenë pikërisht Gentjan Bejtja, një person me presedentë penalë, që u ka shpëtuar dhe dy atentateve të tjera, një në vitin 2016 dhe një tjetër në vitin 2022, ku u plagos në krah.
Njoftimi i plotë i Policisë:
Krujë/Informacion shtesë
Në lidhje me informacionin paraprak të dhënë mbrëmë, për ngjarjen e ndodhur në oborrin e banesës së shtetasit G. B., ju bëjmë me dije se:
Ka ndërruar jetë si pasojë e plagëve të marra shtetasi R. S., 29 vjeç, si dhe janë plagosur dhe ndodhen në spital, nën kujdesin e mjekëve, dy të mitur të moshës 13 dhe 10 vjeç, (nipat e shtetasit R. S).
Me qëllim identifikimin dhe kapjen e autorit/ëve të dyshuar, shërbimet e Policisë kanë ushtruar 3 kontrolle në 3 banesa si dhe kanë shoqëruar 3 persona që mund të kenë dijeni për ngjarjen.
Në përfundim të veprimeve hetimore në lidhje me ngjarjen, do të ketë një njoftim për shtyp në vijim.
