Jorida Tabaku ka dhënë dorëheqjen si nënkrytare e Partisë Demokratike. Vendimi i saj ka ardhur në orët e para të mëngjesit të sotëm, vetëm pak pasi në mbledhjen e Kryesisë u caktua data për zgjedhjet brenda Partisë Demokratike.
Në një deklaratë për mediat, Tabaku tha se kërkesa e saj ishte mos bëhej një proces i njëanshëm dhe të binin dakort për mënyrës se si do të riorganizohej Partia Demokratike. Ajo thekson se refuzoi të votojë pasi mënyra se si ky vendim i mor dhe në kushtet në të cilat u mor, dëmton sërish Partinë Demokratike.
Në fillim të mbledhjes ajo nuk pranoi as propozimin e bërë nga sekretari i përgjithshëm i PD-së, Gazmend Bardhi që të ishte kryetare e komanduar e partisë deri në zgjedhjen e kryetarit të ri.
Gjatë mbledhjes së djeshme, e cila zgjati deri në orët e para të mëngjesit, 17 anëtarë votuan për hapjen e menjëhershme të garës dhe mbajtjen e zgjedhjeve për kryetar të partisë në 29 korrik.
DEKLARATA E PLOTË E TABAKUT:
Faleminderit për durimin dhe për pritjen e gjatë. Kryesia e PD mbas një mbedhje 8 orë të gjatë vendosi për të vazhduar përpara me procesin e zgjedhjeve në parti. Kërkesa ime dhe dëshira ka qenë e vetme dhe e thjeshtë, mos nxitohemi dhe t’I japim demokratëve një process të drejtë, real dhe që na nderon.
Të gjithë ishim dakord për faktin që PD duhet të riorganizohet por nuk gjetëm gjuhën e përbashkët për mënyrën se si duhet të riorganizohemi. I kërkova kryesisë të mos marrim vendim të nxituar, çdo vendim i njëanshëm thjesht do të zvogëlojë edhe më shumë partinë tonë dhe nuk do ta zmadhojë atë. Në kushtet që jemi ne nuk kemi luksin të përsërsim të njëjtat gabime!
Pyetja që sot duhet t’i bëjmë vetes është nëse duam një parti të kryetarit apo kryetar për partinë tonë? Ne duhet patjetër të hapim PD, duhet të përpiqemi mos bëjmë procese të njënashme, duhet të përfshijmë këdo.
Me vlerësimet maksimale për deputetët dhe kontributin e tyre, kolegjit të kryetarëve dhe kontributin e tyre dhe të gjithë ato që kanë qëndruar. I premtova anëtarëve të kryesisë që do të qëndroj deri në fund, derisa mund të gjejmë një zgjidhje që i përfshin të gjithë në process. Të mos nxitohemi!
Pas vendimit të kryesisë për të vazhduar procesin zgjedhor, kërkova që të gjejmë një dakordësi për mënyrën si?! Në gjykimin tim veprimet e tilla të njëanshme si në të shkuarën kanë ndikuar në zvogëlimin e PD dhe kanë sjellë në një situatë si kjo e sotmja. Prandaj refuzova të votoj për një vendim që në mendimin tim na dëmnton sot për mënyrën se si po merret dhe në kushtet në të cilat po merret!
Duke pasur parasysh gjithë situatën, vendosa që të tërhiqem edhe nga pozicioni i nënkryetares së PD!
