Kryeministri Edi Rama është takuar këtë të shtunë me punonjësit e sigurisë në vend, të Policisë së Shtetit, Forcave Speciale, Gardës së Republikës dhe ata të Burgjeve, të cilëve jua ka dhënë vetë lajmin e rritjes së pagave. Reforma përfshin dhe punonjësit zjarrfikës.
“Sot jemi në ditën kur mund ta bëjmë këtë rritje të konsiderueshme të pagës. Ajo do bëhet me dy hapa, një do të bëhet tani dhe një si sot një vit, pra vitin tjetër. Për ju që jeni në këtë sistem, do të përfitojnë 12,120 punonjës te Policisë së Shtetit, Gardës së Republikës, si dhe 3,566 punonjës të sistemit të Policisë së Burgjeve”, u shpreh Rama.
Kryeministri u kujdes të sqaronte se rritja që ai do të thoshte më vonë, ishte vetëm në bazë niveli, pastaj me llogaritjet e vjetërsisë që do bëhen në zyrat përkatëse, ajo do të jetë dhe më e lartë për nivele të caktuara brenda strukturës.
“Do jetë pak a shumë si vijon, kini parasysh që paga e çdo niveli nuk është njësoj për të gjithë, sepse ka vjetërsi pune dhe kushte të tjera. Unë po flas këtu për pagën e nivelit”, vijoi ai.
Edi Rama e nisi me pagën e kryepolicit Muhamet Rrumbullaku, të cilin e kishte në krah dhe tha se ai do të marrë 187 mijë lekë të reja në muaj, pra me një rritje prej 48 mijë lekësh të reja. Më poshtë, janë rritjet përkatëse *në lekë të reja:
Rritja e pagës për punonjësit e sigurisë, Policia e Shtetit:
Sot paga e drejtuesit madhor është 139,375 mijë lekë dhe sot me 48 mijë lekë shtesë, shkon në 187 mijë lekë.
Për drejtuesit, poshtë Drejtuesit Madhor, shtohet me 24 mijë lekë dhe bëhet 137 mijë.
Për Komisarin shtohet me 21 mijë lekë, dhe shkon 112 mijë lekë,
Për inspektorin e parë shtohet edhe kjo me 20 mijë lekë dhe shkon në 97 mijë lekë.
Rritja e pagës për punonjësit e sigurisë në Burgje:
Për Burgjet, Drejtuesi Madhor sot e ka 138 mijë lekë dhe shkon në 187 mijë lekë,
Drejtuesi më poshtë, e ka 112 mijë lekë dhe shkon në 137 mijë lekë,
Komisari e ka 83 mijë lekë dhe shkon 112 mijë lekë,
Dhe inspektori i parë 71 mijë lekë dhe shkon në 97 mijë lekë.
Rritja e pagës për PMNZH, do të përfitojnë 1,118 punonjës:
Edhe këtu drejtuesi zjarrfikës shkon në 125 mijë lekë,
Inspektori shkon në 90 mijë,
Zjarrfikësi shkon në 80 mijë,
Dhe asistent/zjarrfikësi shkon në 75 mijë lekë.
