Ministrja e Financave dhe Ekonomisë, Delina Ibrahimaj, ka dhënë komentin e saj në lidhje me kritikat sa i takon Bordit të Transparencës për të cilat PD ka bërë kërkesë për shkrirjen e saj në Gjykatën Kushtetuese. Ibrahimaj u shpreh se Bordet kanë zbatuar aktin normativ për të përllogaritur çmimin e karburanteve, në bazë të kostos në bursë të produkteve të rafinuara.
“Unë e them me përgjegjësi dhe bindje të plotë që Bordet kanë zbatuar aktin normativ që parashikon formulën e përllogaritjes së çmimeve në çdo rast. Çmimi ndryshon në bazë të bursës për çmimin e naftës së rafinuar dhe jo bruto.
Kam bindje të bazuar në shifra që marzhet e fitimit të kompanive të hidrokarbureve janë ndjeshëm më të ulëta se ato të një viti më parë, që nga ngritja e Bordeve.
Që do të thotë që për sa kohë çmimet e karburanteve do të jenë mbi mesatare, ne do të fillojmë të mbajnë këtë regjim. Do të vijojmë për sa kohë të jetë e nevojshme që çmimet e karburanteve të mbahen nën kontroll”, u shpreh ajo.
Një muaj më parë, 28 deputetë të Grupit Parlamentar të Partisë Demokratike, iu drejtuan Gjykatës Kushtetuese me kërkesë për shfuqizimin e Bordeve të caktimit të çmimeve.
Deputetja Dhurata Çupi, u shpreh se Bordi i ngritur për të mbajtur në kontroll çmimin, është shndërruar në Klubin e Oligarkëve, ku vetë oligarkët e naftës në përbërje të Bordit caktonin edhe çmimin.
