Lucas Ocampos, ish-futbollisti i Marseille dhe Milan, ka folur për një nga trajnerët më të diskutuar në futbollin botëror, Marcelo Bielsa. Vlerësimi i tij për argjentinasin është i jashtëzakonshëm dhe ai e ka treguar duke folur për periudhën kur u vu nën urdhërat e tij te Olympique Marseille.
“Të stërviteshe nga ai ishte një eksperiencë unike, nuk e njihja, por kisha dëgjuar shumë gjëra rreth tij. Asistenti i tij më telefonoi dhe më tha që dëshironte të fliste me mua. Kështu u takuam dhe në fund shkova menjëherë të merrja rrobat e mia. Firmosa kontratën të martën dhe të shtunën isha në fushë.
Por në ato ditë, nuk kam pasur asnjë lloj kontakti me Bielsën, as në fushën e lojës. Ai të mëson në distancë, por për mua është një prej trajnerëve më të mëdhenj që kam pasur ndonjëherë. Ai është si Profesori te “La Casa De Papel””, ishin fjalët e sulmuesit i cili aktualisht është pjesë e skuadrës së Sevilla në La Liga.
