Një grua është arrestuar në Itali, pasi akuzohet për vrasjen e djalit të saj 2-vjeçar.
Donatella Di Bona, 29 vjeçe, të mërkurën pasdite kishte kërkuar ndihmë nga urgjenca duke iu thënë se djali i saj Gabriel Feroleto ishte goditur nga një makinë.
Por, pas marrjes në pyetje, karabinierët arritën në përfundimin se ishte vetë e ëma ajo që e kishte mbytur të birin.
Policia hedh dyshime se gjendja e saj psikike mund të jetë bërë shkak për vrasjen e vogëlushit, sepse thjesht ai donte të kthehej tek gjyshja e tij, e cila jetonte pranë tyre. Për gruan akuza është ajo e vrasjes së rëndë.
DËSHMIA
“Ai po qante dhe donte të kthehej në shtëpi tek gjyshja e tij, i shtrëngova qafën dhe i mbylla gojën që të pushonte”. Ky është rrëfimi i nënës, sipas gazetës Frosinone Today, që Donatella Di Bona i dha karabinierëve pas marrjes në pyetje, në të cilën ka dhënë dëshmi kontradiktore disa herë.
Në një moment iu kishte thënë karabinierëve se ishte ajo që e kishte përplasur aksidentalisht me makinë. Por makina e saj nuk kishte dëme. Ndërsa ajo kishte gërvishtje në qafë dhe në fytyrë. Dhe nisur nga këto plagë, ajo në fund rrëfeu krimin monstruoz.
