Taksa e lartë që Kosova i ka vendosur mallrave nga Serbia dhe Bosnja ka qenë lajm i mirë për eksportuesit nga Shqipëria dhe Maqedonia, tregojnë të dhënat.
Pasi Kosova vendosi një taksë prej 100 për qind mbi importet nga Serbia dhe Bosnja, duke cituar qëndrimin e tyre armiqësisë, Kosova duket se po i zëvendëson importet nga Serbia me ato të vendeve të tjera në rajon.
Dogana e Kosovës thotë se Shqipëria dhe Maqedonia kanë përfituar më së shumti që kur u vendos tarifa.
“Eksportet nga Shqipëria janë rritur me 39 për qind dhe ato nga Maqedonia janë rritur me pothuajse 10 për qind,” tha për BIRN Adriatik Stavileci nga Dogana e Kosovës.
Nova Makedonja në Maqedoni në dhjetor raportoi se Administrata e Doganave të Kosovës kishte thënë se vëllimi i eksporteve shqiptare në Kosovë ishte rritur me 33 mijë ton, me një vlerë prej 7 milionë dollarësh, krahasuar me të njëjtën periudhë të një viti më parë.
Përsa i takon Maqedonisë, sipas Administratës Doganore, vlera e përgjithshme e eksporteve në Kosovë në dhjetor/janar arriti në gati 171 milionë euro, nga 156 milionë euro që ishte në të njëjtët muaj në vitin 2017.
BIRN raportoi më herët se bizneset maqedonase prisnin të përfitonin nga vendimi i Kosovës për të vendosur një taksë të lartë për importet nga Serbia, veçanërisht nga mallrat bujqësore.
Kosova vendosi një tarifë 100 për qind për importet nga Serbia dhe Bosnja dhe Hercegovina në fund të nëntorit, vetëm një ditë pasi ajo nuk arriti të bëhej një anëtare e Interpolit.
Kosova fajësoi lobimin serb për këtë dështim diplomatik.
Kryeministri i Kosovës Ramush Haradinaj që atëherë ka thënë se do t’i heqë këto masa vetëm kur Serbia të njohë Kosovën si shtet i pavarur, gjë që Serbia është zotuat se s’do ta bëjë kurrë.
Megjithatë, Serbia nuk ka njoftuar masa reciproke, pjesërisht për shkak se ajo importon shumë pak gjëra nga ish-provinca e saj.
BE-ja dhe SHBA-ja i kanë bërë thirrje Kosovës të tërheqë masat e saj, pjesërisht për shkak të detyrimeve të saj me CEFTA-n. Ato i kanë bërë thirrje gjithashtu të dyja palëve të mos vazhdojnë me provokime të mëtejshme./Reporter.al
