Presidenti i skuadrës turke të Besiktas konfirmoi një ditë më parë se ata janë në kërkim të një mbrojtësi, për të mbuluar boshllëkun që la largimi i Pepes. Ata i kishin shkelur syrin mbrojtësit të kombëtares shqiptare, Berat Gjimshitit.
Ndërkohë sot, për mbrojtësin 25-vjeçar, dalin detaje të reja nga mediat turke. Siç flitet, tek Atalanta mund ta lejojnë Gjimshitin të largohet, vetëm për shumën e 400 mijë eurove.
Por ndërkohë, nga ana tjetër, pala turke do të dëshironte që ta merrte qendërmbrojtësin e Kombëtares në merkaton e verës, për një shifër më të vogël parash. Gjithsesi, ditët në vijim do të jenë kyçe, për të parë nëse bisedimet do të zhbllokojnë edhe këtë operacion, dhe Gjimshiti të transferohet te klubi i madh i Superligës turke.
