Pak orë para fillimit të takimit që Sampdoria do të luajë kundër Juventus, ka folur presidenti i klubit dorian, Masimo Ferrero ku ka dhënë deklaratën që ka surprizuar jo pak të gjithë.
Ai ka komunikuar për “Rai Radio 1 Sport”, se është i gatshëm që të presë flokët në rast se ekipi i tij fiton kundër “Zonjës së Vjetër”. “Kam flokë të gjatë, i kam mbajtur gjithmonë kështu, por nëse fitojmë ndaj Juventusit, do t’i pres të gjitha, do t’i bëj si Nainggolan”- ka qenë premtimi i Ferreros.
Numri një i Sampdorias nuk mund të rrinte pa folur disa fjalë dhe për trazirat e shkaktuara në Milano para ndeshjes Inter-Napoli: “Futbolli është argëtim dhe kjo gjë nuk duhet të ndalet. Duhen shtuar kujdestarë për zbatimin e ligjit.
Nëse një ultras shkon në stadium për të shqetësuar të tjerët, ai duhet neutralizuar. Por, në stadiume janë 60 mijë njerëz dhe nuk mund të ndëshkohen të gjithë për një “dru të shtrembër”. Në futboll nuk duhet të ketë dhunë dhe racizëm, ne po flasim për sport dhe argëtim.”- ka përfunduar Ferrero.
