Presidenti i SHBA-ve, Donald Trump i befasoi të gjithë pak ditë më parë kur deklaroi tërheqjen e trupave amerikane nga Siria. Një veprim që habiti të gjithë aleatët e tij dhe solli dorëheqjen e dy ndihmësve të tij. Ndërsa tani Rusia i ka kërkuar Turqisë që të tërhiqet nga këto zona dhe të lejojë qeverinë siriane të marrë kontrollin e këtyre territoreve të liruara nga ushtria amerikane.
Ministria e Jashtme e Kremlinit tha se pret që territori t’i dorëzohet forcave të Asadit pasi SHBA njoftoi tërheqjen nga vendi javën e shkuar. Por nga ana tjetër Turqia është shprehur se po punon me Uashingtonin për të koordinuar tërheqjen e forcave amerikane, por gjithashtu mbetet “e vendosur” për të pastruar luftëtarët kurdë nga Manbij në Siri veriore.
Ditën e sotme janë publikuar disa foto të automjeteve të blinduara të cilat transportojnë trupa drejt kufirit me Sirinë. Megjithatë, trupat siriane të Bashar al-Assad dhe forcat ruse kanë filluar të vendosen pran qytetit.
Zëdhënësja e Ministrisë së Jashtme të Moskës, Maria Zakharova, theksoi se territoret në Sirinë lindore duhet t’i dorëzohen qeverisë siriane në përputhje me ligjin ndërkombëtar. Ajo tha se Moska nuk ishte në dijeni për asnjë detaj të tërheqjes nga Siria, por shtoi se kjo do të ndihmonte që situata në Siri të zgjidhej në mënyrë paqësore. “Nëse tërheqja e trupave do të ndodhë, kjo do të kishte një ndikim pozitiv në situatën,” tha Zakharova në një konferencë.
E pyetur rreth planeve të Turqisë për të nisur një sulm në atë zonë, Zakharova u përgjigj se Rusia dhe Turqia kishin koordinuar ngushtë veprimet e tyre në Siri, duke përfshirë operacionet ushtarake kundër-terroristëve, por nuk do të bashkëpunonin më tej.
Por nga ana tjetër një zëdhënës i opozitës siriane, të cilët mbështeten nga Turqia, u shpreh se luftëtarët e tyre nuk do të pranonin kthimin e forcave qeveritare në zonat e Sirisë lindore, duke përfshirë qytetin Manbij, pasi u tërhoqën forcat amerikane.
Youssef Hammoud, zëdhënësi i Armatës Kombëtare Siriane (SNA), tha se qëllimi kryesor i operacionit të drejtuar nga Turqia në Sirinë lindore ishte krijimi i kushteve dhe hapësirës për kthimin e refugjatëve dhe personave të cilët ikën nga qeveria siriane.
SNA tha se deri në 15,000 ushtarë të saj ishin të gatshëm të hyjnë në ato zona sapo SHBA të largonte trupat e tyre. Por prej disa javësh, Turqia po kërcënon të nisë një sulm të ri kundër luftëtarëve kurdë, të cilët u bashkuan me Shtetet e Bashkuara për të larguar ISIS nga Siria veriore dhe lindore.
Ankaraja i sheh forcat kurde si terroristë për shkak të lidhjeve të tyre me një grup kryengritës brenda Turqisë. Mbështetësit e opozitës siriane të mbështetur nga Turqia janë duke u vendosur në periferi të Manbij. Nga ana tjetër ushtria turke vazhdon të dërgojë tanke, artileri dhe pajisje të tjera në kufi dhe në një zonë që administrohet nga Turqia në Sirinë veriperëndimore, raportojnë mediat turke. TIRANA TODAY
