Tensionet mes Turqisë dhe Greqisë sa vijnë dhe shtohen, ku janë turqit ata që rrisin provokimet nga dita në ditë. Së fundmi disa avionë luftarakë kanë fluturuar mbi territoret greke dhe kjo ka ngritur kambanat e alarmit. Në Greqi është mbledhur Këshilli i Sigurisë, ku fjalën e ka mbajtur ministri i Jashtëm, Giorgos Katrougalos.
Sipas mediave greke, Katrougalos shprehu shqetësim lidhur me ngjarjen e fundit të shkeljes së hapësirës ajrore nga avionët luftarakë turq, si dhe strategjinë që po ndjek Ankaraja. Katrougalos i dha mbështetje edhe deklaratave që bëri pak ditë më parë admirali Evangelos Apostolakis, shefi i Shtabit të Përgjithshëm të Mbrojtjes Kombëtare Greke (GEETHA), i cili vendosi “vijën e kuqe” lidhur me aktivitetet turke në Egje, duke thënë se ‘nëse trupat turq zbarkojnë në një ishull grek, ai ishull do të rrafshohet’.
“Ne nuk kemi interes që ti japim vrull asaj që po bën Turqia, shefi i GEETHA dërgoi një mesazh të qartë për fuqinë parandaluese të forcave të armatosura, siç duhet të kishte bërë”, tha Katrougalos. Të drejtat kombëtare të Greqisë, tha ai, janë “të bazuara në të drejtën ndërkombëtare” kështu që nuk ka arsye për të investuar në një përshkallëzim të situatës, shtoi ai.
Turqia nga ana tjetër, këmbënguli ai, po ndjek një politikë revizioniste ndaj të drejtës ndërkombëtare dhe po përdor “provokime nga më të ndryshmet”. Ndërkohë qeveria është ende në diskutime me Turqinë për të mbajtur një takim muajin e ardhshëm në Stamboll midis kryeministrit Alexis Tsipras dhe Presidentit turk Rexhep Tajip Erdogan.
Nga ana e tij, ministri i jashtëm Giorgos Koumoutsakos i ‘Demokracisë së Re’ tha se çdo sfidë ndaj së drejtës ndërkombëtare dhe gjendjes ekzistuese në Egjeun dhe Mesdheun Lindor “nuk mund të tolerohet”.
“Ankaraja nuk duhet të mendojë se duke rritur tensionin e tanishëm ajo mund të krijojë kushte që do ta detyrojnë Greqinë për çdo lloj negocimi. Ne kërkojmë dialog, por dialogu nuk mund të jetë produkt i një përshkallëzimi politik të tensionit,” shtoi ai. Përshtati TIRANA TODAY
