Ish-nënpresidenti i Amerikës Joe Biden mund të kandidojë përballë Trump për President. Biden tha të hënën se vendimi për të kandiduar për president në vitin 2020, varet nga fakti nëse ai dhe familja e tij janë ‘gati’. Megjithatë Biden e vuri theksin te përgatitja e tij.
“Mendoj se jam personi më i kualifikuar në vend për të qenë president”, tha Biden para një audience në Missoula të Montanës.
“Çështjet me të cilat përballemi si vend sot, janë çështje për të cilat unë jam marrë gjithë jetën, përpjekjet e klasës së mesme, politika e jashtme. Por unë dhe familja ime duhet të vendosim së bashku nëse jemi gati. Ne çdo gjë e bëjmë si familje”.
Por, kur do e marrë vendimin Biden nëse do të garojë për president? Ish-nënpresidenti tha se vendimin do e merrte brenda 2 muajsh.
“Kam një mbesë dhe një nip të cilëve u ka vdekur i ati, që më duan dhe duan që të jem pranë tyre. Unë dua të jem i pranishëm të kujdesem për ta, prandaj duhet të shikojmë nëse mund ta realizojmë këtë si familje”, citohet ai nga “VOA”, duke iu referuar fëmijëve të djalit të tij Beau Biden, që vdiq në vitin 2015 nga kanceri në tru.
Biden ka thënë se për shkak të vdekjes së djalit të tij, nuk kandidoi për president në vitin 2016.
