Presidenti Donald Trump kishte menduar t’i bënte një dhuratë me vlerë 50 milionë dollarësh homologut rus, Vladimir Putin.
Kjo shumë do të shkonte për një apartament që Trump kishte menduar t’i dhuronte Putin, apartament ky në qiellgërvishtësin që po përpiqej të ndërtonte në Moskë. Konkretisht dhurata do të ofrohej nga “Trump organization”, shoqëria që drejtohet nga presidenti amerikan. Nuk dihet nëse kreu i Shtëpisë së Bardhë ishte në dijeni të ofertës dhe sipas avokatit të tij në çështjen Rusiagate, Rudy Giuliani, Trump nuk ka dëgjuar asgjë për këtë çështje.
Ky lajm është publikuar nga BuzzFeed, duke cituar Felix Sater, i cili punonte në projekt me ish-avokatin personal të Trump, Michael Cohen.
Cohen i cili tashmë po bashkëpunon me prokurorin special që heton çështjen Russiagate, ka diskutuar për këtë dhuratë me zëdhënësin e Putin në fund të muajit qershor në vitin 2016, në kohën e fushatës elektorale për zgjedhjet presidenciale amerikane.
Gjithnjë në kuadër të hetimeve, prokurori special Muller i cili heton për Russiagate tashmë është përqendruar dhe tek fëmijët e presidentit amerikan Donald Trump, Donald Junior e Ivanka. Lajmi është publikuar nga Yahoo News, duke theksuar se Muller synon të qartësojë rolin e dy fëmijëve të presidentit në organizimin e takimit me të dërguarit nga Moska në Kullën Trump në vitin 2016.
Donald Junior dhe Ivanka kanë punuar prej vitesh në projektin për ndërtimin e një Trump Toëer në Moskë, deri në vitin 2013.
