Mark Zuckerberg ka konfirmuar një ditë më parë për CNN, se nuk e ka në plan që të dorëhiqet. “Nuk është ky plani”, tha Zuckerberg për “CNN Business”, teksa u pyet nëse do ta konsideronte një dorëheqje të mundshme si drejtues i rrjetit social më të përhapur në botë.
Rrjeti social, kohët e fundit është duke u përballur me pasojat e përdorimit të kësaj platforme nga Rusia, për të ndërhyrë në zgjedhjet presidenciale të vitit 2016 në Shtetet e Bashkuara; me skandalin e “Cambridge Analytica”. Thuhet se të dhënat e përdoruesve u shfrytëzuan në përpjekje për të ndihmuar kandidatin Donald Trump; si dhe një dështim sigurie i rëndësishëm, që përfshiu miliona llogari në rrjetin social.
Një artikull investigativ i publikuar nga “New York Times” tregonte se Facebook-u mashtroi publikun mbi atë që dinte nga ndërhyrja ruse në zgjedhje, madje kishte përdorur një firmë “PR”-i për të përhapur lajme negative mbi kompani të tjera nga “Silicon Valley”, në mënyrë që të shmangte vëmendjen apo irritimin ndaj vetes. Në kundërpërgjigje të këtij artikulli, Zuckerberg ka thënë se është i pasigurtë në lidhje me vërtetësinë e këtij raporti.
“Për mua nuk është ende e qartë nëse raporti është i vërtetë apo jo”, tha ai. “Për shumë gjëra që ishin në atë raportim, ne kemi biseduar me reporterët përpara atij publikimi dhe u kishim thënë se, nga sa shihnim ne, asgjë nuk ishte e vërtetë. Por ata zgjodhën ta publikonin, pavarësisht kësaj”.
