Princi saudit i kurorës Mohammed bin Salman ka urdhëruar personalisht vrasjen e gazetarit Jamal Khashoggi. Ky është përfundimi i arritur nga CIA, edhe pse qeveria saudite mohon të jetë përfshirë në vrasje.
Një zyrtar i lartë amerikan tha për CNN se përfundimi bazohet në një regjistrim të dhënë nga qeveria turke dhe prova të tjera, duke përfshirë edhe inteligjencën amerikane.
Po ashtu, sipas hetuesve, vrasja nuk mund të ndodhte pa dijeninë e Salman, duke marrë parasysh kontrollin e tij ndaj qeverisë.
Ndërkohë, ka pasur një reagim edhe nga ana e ambasadës saudite, teksa një zëdhënëse tha se “pretendimet në këtë vlerësim të supozuar janë të rreme. Ne kemi dëgjuar dhe vazhdojmë të dëgjojmë teori të ndryshme pa parë fakte për këto spekulime”.
Po ashtu, CIA bazohet edhe te një telefonatë që vëllai i princit Khalid bin Salman i bëri Khashoggit, duke e shtyrë gazetarin që të bënte udhëtimin në konsullatë për të marrë dokumentet për martesën e tij të ardhshme.
Khalid e mohoi lajmin, duke shkruar në Twitter se ai kurrë nuk kishte folur me Khashoggin në telefon:
“Kurrë nuk kam biseduar me të në telefon dhe sigurisht nuk i kam sugjeruar kurrë që ai të shkonte në Turqi për ndonjë arsye. Unë i kërkoj qeverisë amerikane të japë çdo informacion në lidhje me këtë deklaratë”.
Ai tha se kontakti i fundit që kishte pasur me Khashoggin ishte nëpërmjet një mesazhi në tetor 2017.
Administrata Trump të enjten dha dënime ndaj 17 individëve mbi rolin e tyre të dyshuar në vrasjen e Khashoggit. Vrasja e Khashoggit ka krijuar një krizë për administratën Trump dhe ka tërhequr vëmendjen ndaj lidhjeve të biznesit të Presidentit Donald Trump me Arabinë Saudite dhe marrëdhëniet midis bin Salman dhe dhëndrit të Trump dhe këshilltarit të lartë, Jared Kushner.
Prokuroria Publike Saudite tha të enjten se 11 persona ishin akuzuar për përfshirjen e tyre në vdekjen e Khashoggit, duke shtuar se pesë janë dënuar me vdekje për përfshirjen e drejtpërdrejt në “urdhërimin dhe ekzekutimin e krimit”.
