Zbulohen detaje të reja rreth arratisjes së ish-kryeministrit maqedonas, Nikolla Gruevski. Ky i fundit kërkoi azil politik në Hungari, pasi u dënua nga një gjykatë maqedonase me 2 vite burg për rastin “Tank”.
Ministri i Brendshëm i Maqedonisë, Oliver Spasovski ka deklaruar se familja e të arratisurit është ende në Maqedoni, ndërsa mësohet se shtëpia e ish-kryeministrit është kontrolluar nga autoritetet përkatëse.
“Bashkëshortja e tij ka qenë në shtëpi dhe i ka mundësuar pjesëtarëve të MPB-së të kryejnë kontrolle. Kjo është bërë edhe në shtëpinë e nënës së tij”, ka thënë Spasovski.
Por, si është arratisur ish-kryeministri maqedonas?
Mediat maqedonase shkruajnë se Gruevski ka qenë i maskuar si grua dhe se ka përdorur pasaportë bullgare duke dalë nga kufiri i gjelbërt, përmes një makine diplomatike hungareze.
Edhe ministri Spasovski ka treguar se Gruevski nuk është larguar nga rrugët ajrore.
