Presidenti turk Rexhep Tajip Erdogan ka kërkuar që Arabia Saudite të zbulojë vendndodhjen e trupit të gazetarit të vrarë, Jamal Khashoggi. Po ashtu, Erdogan i kërkoi mbretërisë që t’i dorëzojë të dyshuarit për vrasjen e shkrimtarit.
Erdogan tha se kryeprokurori saudit do të udhëtojë në Turqi të dielën për të takuar homologun e tij turk. Po ashtu, presidenti turk tha se ata që janë përgjegjës për vrasjen e gazetarit, duhet të gjykohen në Turqi.
“Nëse jeni të vendosur, nëse doni të zhdukni dyshimet, këta 18 persona janë fundi i kësaj historie”, tha Erdogan duke iu drejtuar krerëve provincialë Partia për Drejtësi dhe Zhvillim në Ankara.
“Nëse sauditët nuk mund t’i bëjnë të dyshuarit të flasin, atëherë Turqia do t’i bëjë”, tha ai.
“Incidenti ndodhi në Stamboll. Pra, na i dorëzoni neve, dhe na lejoni t’i gjykojmë ata”, tha ai.
Pasi Arabia Saudite pranoi se Khashoggi u vra më 2 tetor në konsullatën e saj në Stamboll, pesë zyrtarë të rangut të lartë u shkarkuan, duke përfshirë edhe shefin e medias së Salman dhe nënkryetarin e shërbimit sekret të Arabisë Saudite. Tetëmbëdhjetë vetë u arrestuan.
Erdogani ka përshkruar disa nga deklaratat e bëra nga autoritetet saudite për rastin e Khashoggit si “shumë qesharake” dhe tha se sjellja e çuditshme e tyre kishte rritur përgjegjësinë e autoriteteve turke për të vepruar./ TIRANA TODAY
