Eros Grezda u aktivizua në të dy takimet me kombëtaren përballë Jordanisë dhe Izraelit. Ai vjen nga një dëmtim që e mbajti për shumë kohë jashtë fushave dhe kjo ishte hera e parë që luante 90’ minuta pas gati 7 muajsh. Grezda në një intervistë për sajtin kroat “sportske.jutarnji.hr”. Sulmuesi kuqezi në këtë intervistë ka sulmuar keq jordanezët për lojën e ashpër që zhvilluan dhe ka përfituar që tu japë disa këshilla kombëtares kroate.
“Jordania është një ekip i panjohur. Cilësisht janë të dobët. Ata nuk kanë asgjë të mirë në lojën e tyre vetëm gjëra të këqija. U them lojtarëve të Kroacisë të kenë kujdes, pasi nuk kisha përjetuar prej një kohe të gjatë aq shumë brutalitet dhe huliganizëm në lojë. Një nga lojtarët tanë të rinj, Enea Mihaj, u detyrua të linte fushën pas 10 minutash, pasi u dëmtua keq në këmbë.
Dy lojtarë tanë u dëmtuan. Unë u detyrova të vazhdoja terapinë. Me Kroacinë do të mbyllen dhe motivohen më shumë. Ne ishim të lodhur dhe nuk shfrytëzuam 7-8 mundësi të mira për të shënuar, por Kroacia do ta gjejë rrjetën. Duhet vetëm të shënohet goli i parë më pas hapen vetë”.
Grezda zbuloi dhe një prapaskenë interesante për kalimin e tij nga Osijek-u te Rangers-i. Në skuadrën skoceze do të bashkohet sërish me Born Barisic. Një histori intersante, pasi është ekipi i 3 që do të luajnë së bashku. Fillimisht janë njohur te Lokomotiva e Zagreb-it, më pas kanë kaluar te Osijek-u dhe tashmë te Rangers-i. “Ky është ekipi i tretë që luajmë së bashku. E nisëm te Lokomotiva ku u bëmë shokë të ngushtë. Vazhduam te Osijek-u ku miqësia jonë u forcua, ndërsa tani te Rangers-i. E pranoj, ai ishte menaxheri im”, – thotë me shaka Grezda.
Më pas , shqiptari shpjegon dhe mënyrën se si e ka ndihmuar Barisic që të kalojë te Rangers-i. “Kur shkova në Skoci mësova se ata më ndiqnin prej kohësh. Trajneri Steven Gerrard më kishte parë në ndeshjet që kisha luajtur me Osijek-un. Në momentin që Barisic kaloi te Rangers-i, ata folën mes tyre dhe Borni i foli në lidhje me cilësitë e mia. Nuk jam ende gati, pasi jam në fazën e rikuperimit”, – u shpreh Grezda në lidhje me aktivizimin e tij.
