Kryeministri grek Alexis Tsipras ka marrë një ftesë zyrtare për të vizituar Moskën. Ai pritet të takohet me presidentin rus, Vladimir Putin, më 12 dhjetor të këtij viti.
Ky takim është i një rëndësie të veçantë, pas marrëdhënieve të tensionuara greko-ruse. Ky takim shikohet si përpjekje për shërimin e plagëve të hapura, që pas dëbimit të disa diplomateve nga të dy palët. Nga ana tjetër, ky zhvillim do të japë sinjalin për një periudhë të re miqësie mes dy vendeve.
U bënë 4 muaj, që kur Athina dëboi diplomatët rusë, me akuzën se u përpoqën të minonin marrëveshjen e Athinës me Shkupin për emrin e Maqedonisë. Në atë kohë akuzoi Rusinë se po bëhej aleate e Turqisë kundër Perëndimit dhe Greqisë. Athina zyrtare i kërkoi Moskës respekt dhe marrëdhënie të barabarta. Përgjigjja ishte e njëjtë edhe nga Moska, që dëboi gjithashtu një numër të njëjtë diplomatësh.
E ndërsa muajt e fundit po dukej se kryeministri Tsipras dhe qeveria e tij kishin fituar një përkrahje jashtëzakonisht të madhe nga Uashingtoni, misionet diplomatike kanë punuar për të realizuar edhe këtë takim të udhëheqësit grek me presidentin rus, duke planifikuar madje edhe agjendën e diskutimeve që do të përkufizojnë të ardhmen e bashkëpunimit dypalësh.
Ai përmban marrëdhëniet mes dy vendeve dhe bashkëpunimin në sektorët e tregtisë, lundrimit, turizmit, energjetikës. Por, gjithashtu e vë theksin edhe te zhvillimet rajonale dhe çështjet kombëtare, si marrëdhëniet greko-turke dhe problemi i Qipros.
