U duk sikur në kampin bardheblu u rikthye qetësia, por zgjati vetëm pak ditë. Tirana është mposhtur në shtëpi nga Laçi me rezultatin e ngushtë 1-0, pas një fitoreje me Kastriotin në mesjavë. Gjithçka u vendos në minutën e 50’ nga i riu Redon Xhixah, i cili shfrytëzoi më së miri një pasim nga Fangaj dhe shënoi golin e fitores së madhe të kurbinasve, që fluturojnë në renditje.
Kurbinasit vazhdojnë të jenë surpriza e këtij kampionati, pasi nuk janë mposhtur në asnjë ndeshje deri më tani në kampionatin shqiptar. Laçi shkëlqen me emra të panjohur, ndërsa nga ana tjetër është një sulm që paguhet sa gjithë skuadra kundërshtare, por që nuk arrijnë të shënojnë edhe me penallti.
Dukej një ndeshje e ekuilibruar, por në futboll duhet të dish të shënosh dhe Tirana nuk shënon dot as me penallti. Ishte Ngo që fitoi një penallti të çuditshme, por Blazhevski gjuan shumë keq dhe topi përfundon jashtë. Laçi sheh vendet e kreut, Tirana në tunel, por Ze Maria nuk preket, sipas presidentit Refik Halili.
Trajneri Ze Maria ka qenë tepër i revoltuar pas humbjes në shtëpi ndaj Laçit. Në lidhje direkte gazetari i “Supersport”, Sokol Xhihani, raporton se trajneri iu është drejtuar me tone të ashpra lojtarëve në dhomat e zhveshjes dhe më pas ka përplasur dyert.
“I leave”, (Unë largohem), ishin fjalët e Ze Marias, i cili nuk ka preferuar të dalë në prononcimin e zakonshëm pas ndeshjes. Nuk dihet ende nëse Ze Maria do të largohet nga Tirana, apo thjesht është larguar nga stadiumi në shenjë revolte e proteste pas humbjes.
