Ajax e ka nisur me fitore Champions Leaguen, pasi ka mposhtur në Amsterdam, AEK-un e Athinës me rezultatin e thellë 3-0. Gjithçka u vendos në pjesën e dytë dhe meritë për këtë fitore padyshim kishte argjentinasi Tagliafico, i cili ishte autor i dy golave. Sa për statistikë vlen për t’u përmendur se ky ishte goli numër 500 i shënuar nga një argjentinas në veprimtarinë elitare.
Ishte pikërisht argjentinasi që zhbllokoi rezultatin sapo filloi pjesa e dytë. Ndërsa 14 minuta para fundit, 21-vjeçari Donny van de Beek, realizoi golin e dytë për Ajax, që e nis me tre pikë grupin ku bëjnë pjesë edhe Benfica e Bayern Munich. Ndërsa në minutën e fundit ishte sërish Tagliafico që shënoi një supergol dhe vulosi fitoren e holandezëve.
Ndërkohë, aventura e trajnerit më të ri në Champions League, Nagelsmann ka nisur me një barazim në transfertë. Shakhtar dhe Hoffenheim ndanë nga një pikë në ndeshjen e luajtur në Ukrainë, e cila u mbyll 2-2.
Florian Grillitsch shënoi golin e parë për gjermanët, ndërsa vendasit barazuan me anë të Ismaily, megjithatë Havard Nordtveit i dha mundësinë Hoffenheim ta mbyllte pjesën e parë në avantazh duke shënuar golin e dytë. Gjithsesi, nëntë minuta para fundit, braziliani Maycon shmangu humbjen për Shakhtar, teksa shënoi golin e barazimit. Ekipet e tjera në këtë grup janë Manchester City dhe Lyon
