Kosova do të përballet me Ishujt Faraoe në ndeshjen e dytë për Ligën e Kombeve që do të luhet në stadiumin e rinovuar “Fadil Vokrri”. Dardanët në ndeshje e parë arritën një rezultat pozitiv në transfertën e Azerbajxhanit, ku barazoi pa gola. Në tribunë do të jetë Theodhore Theodoridis. Ai mban postin e sekretarit të përgjithshëm në UEFA. Theodoridis ka siguruar mbështetje për Federatën e Futbollit të Kosovës.
“Jam i lumtur që ndodhem këtu në selinë e FFK-së. Më parë keni pasur 2 zyra të vogla ndërsa sot keni hapësira të mëdha dhe kushte të mira pune. Kanë ndryshuar shumë gjëra për mirë, pasi jeni pranuar në UEFA dhe FIFA. Më vjen mirë që sonte do të jem në stadiumin e rinovuar “Fadil Vokrri” dhe është lajm pozitiv që takimet do të t’i luani në shtëpinë tuaj. Ne e kemi për detyrë të ndihmojmë federatat anëtare dhe do të vazhdojmë përkrahjen për ju”, u shpreh Theodoridis.
