Pas një beteje të gjatë me kancerin në tru, është shuar në moshën 81-vjeçare senatori John McCain. I ndjeri shërbeu gjashtë mandate radhazi në Senatin amerikan dhe kandidoi dy herë për president.
Muajt e fundit të jetës, McCain i kaloi larg syve të publikut, në shtetin e Arizonës, duke pranuar vizita nga miqtë e shumtë dhe politikanët e afërt me të. Ai vuante nga glioblastoma, një lloj kanceri i trurit.
Menjëherë pas njoftimit për ndarjen e tij nga jeta, Presidenti Donald Trump shprehu me Twitter ngushëllimet e tij:
“Ngushëllimet dhe respektin më të thellë për familjen e senatorit John McCain. Zemrat dhe lutjet tona janë me ju”.
Në kujtimet e tij të botuara në muajin maj, McCain shkruante se i vinte keq që po ndahej nga bota, por nuk kishte ankesa.
“Krijova një vend të vogël për veten në tregimin e Amerikës, dhe në historinë e kohëve të mia”, shkruante ai.
Muajt e fundit, ai ka qenë një kritik i ashpër i presidentit Trump, për çështje të ndryshme. Ai deklaronte se e shihte presidentin Trump dhe ideologjinë e tij ‘Amerika e Para’, si një largim nga vlerat dhe tradita e udhëheqjes globale që ai mendonte se mishërojnë Shtetet e Bashkuara.
Jeta dhe politika
Në vitin 1967, McCain u burgos dhe u torturua pasi u kap rob në Vietnamin e Veriut, kur ishte pilot i marinës amerikane.
Në sytë e shumë amerikanëve, McCain ishte një hero lufte dhe një patriot.
Ai përfaqësoi shtetin e Arizonës në Senat, dhe u bë i njohur si një luftëtar i së drejtës, pa marrë parasysh se cilin krah politik përfaqësonte ajo.
John McCain u zgjodh në Dhomën e Përfaqësuesve në vitin 1982 dhe në Senat në 1986. Ai ishte një politikan konservator në shumicën e çështjeve, dhe u përpoq sidomos për reformën e financimit të fushatave dhe për çështjen e amerikanëve që rezultonin të zhdukur në Vietnam.
Në zgjedhjet presidenciale të vitit 2008, ai u përball me kandidatin demokrat Barack Obama dhe humbi. Pavarësisht kësaj, ai vijoi të shërbente në Senatin Amerikan.
