Trajneri i kombëtares shqiptare, Christian Panucci, pasi mori në dorë ekipin premtoi se do të sillte një frymë të re dhe një mentalitet të ri futbolli, kryesisht sulmues. Fillimisht tekniku italian vendosi që të rifreskonte skuadrën dhe këtë e bëri duke sjellë sa më shumë talente në përfaqësuese, e një ndër të larguarit ishte kapiteni Ansi Agolli.
Të gjithë e kundërshtuan fillimisht, por Panucci i ‘bindi’ duke thënë se kur të luajmë në Europian Ansi do të jetë 38 vjeç dhe nuk do të ishte në gjendje më të jepte në fushë. Por duket se tashmë gjithçka që është thënë do të tërhiqet pas dhe Agolli do të grumbullohet për ndeshjet e Nacional League.
Ka pasur një telefonatë të gjatë mes Panuccit dhe Agollit, ku ky i fundit kërkoi të dinte pse nuk ishte grumbulluar në ndeshjet e fundit, por në fund kanë rënë dakord dhe kapiteni do të rikthehet për të udhëhequr djemtë kuqezi.
Rikthimi i Agollit është një lajm dyfish i mirë për Panuccin, pasi së pari tashmë do të ketë një mbrojtës me shumë eksperiencë, në krahun e majtë dhe së dyti, pasi tashëm nuk do të duhet të numërojë ndeshjet e lojtarëve, për të vendosur se kush do të mbajë shiritin e kapitenit.
Ansi Agolli numëron 73 ndeshje me Shqipërinë, ku ka shënuar edhe 3 gola, ndërsa që prej 2010 aktivizohet me azerët e Qarabagut, ku ka luajtur më shumë se 200 ndeshje, ka fituar disa tituj kampionë dhe ka kaluar ture të tëra në kompeticionet europiane.
