Ministri i Jashtëm i Serbisë Ivica Daçiç, ashtu sikundër edhe Presidenti Aleksandër Vuçiç, i kanë thënë “po”, idesë së propozuar nga Presidenti i Kosovës Hashim Thaçi për “korrigjim kufijsh”. Për, të mos përsëritur fjalët e homologut të tij kosovar, Vuçiç e promovoi idenë e me togfjalëshin “demarkacion me shqiptarët”.
“Unë kam qenë avokat i kësaj për një kohë të gjatë, mendoj se është e vetmja zgjidhje e mundshme”, tha Daçiç për mediat e Beogradit.
Por kreu i diplomacisë së Beogradit bëri një diversion kur tha gjithashtu se pozicioni i SHBA për çështjen e Kosovës ka ndryshuar, pasi sipas tij, tani të gjithë e shohin palën kosovare si një faktor përçarës që refuzon të bëjë kompromis.
“Ka ndryshuar qëndrimi i Shteteve të Bashkuara, ku më parë besohej se çështja e Kosovës është zgjidhur dhe se ne duhej vetëm ta njohim atë dhe kështu mbyllej ajo temë. Me administratën e re, ka angazhime për të parë të gjitha propozimet për zgjidhje më kreative dhe fleksibile. Kjo është ajo çfarë ne jemi duke kërkuar. Ndaj unë e mbështes këtë propozim, sepse është e vetmja zgjidhje e mundshme dhe shpejtë e cila largon problemin aktual akut”, tha Daçiç.
“Ne kemi një situatë që Shtetet e Bashkuara, Rusia, Franca janë etura për të gjetur një kompromis në dialogun që po modern BE-ja, por Gjermania dhe të tjerët thonë se nuk ka nevojë për të kryer një ndryshim të kufijve. Së pari ata i ndryshuan kufijtë e Serbisë …, e tani nuk mund të thonë se nuk duhet hapur Kutia e Pandorës, të cilën ata vetë e hapën me rastin e Serbisë”, theksoi Daçiç, duke u investuar kështu të bëjë viktimën në rastin e shpalljes së pavarësisë së Kosovës me ndihmë ndërkombëtare.
Daçiç shton se ende nuk është e qartë nëse do të jetë e mundur të arrihet një zgjidhje për çështjen e Kosovës.
Tashmë edhe me këtë qëndrim të fundit nga Beogradi, po kristalizohet dhe më tej ajo që nuhatet; që Thaçi është i vetëm në promovimin e idesë së korrigjimit të kufijve. Diku është bërë një kompromis, që tashmë po nis të zbatohet në terren.
Ndërsa një ditë më parë Presidenti serb Aleksandër Vuçiç është shprehur hapur për korrigjim të kufijve me Kosovën, siç ka kërkuar homologu i tij kosovar Hashim Thaçi.
Pa komentuar idenë e bashkimit të luginës së Preshevës me Kosovën, Vuçiç e konsideroi demarkacionin si zgjidhje për paqe të qëndrueshme mes dy popujve.
“Unë jam në favor të demarkacionit me shqiptarët. Kjo është edhe politika ime për ripërcaktimin e kufijve me ta. Duhet ta kemi të qartë se kemi një territor, të cilit nuk dihet kujt i takon dhe si e trajton. Kjo përbën gjithmonë një potencial të mundshëm për konflikt.
Vuçiç theksoi megjithatë se ende nuk i është parashtruar asnjë çështje konkrete për diskutim. Duke e konsideruar si të vështirë zgjidhjen e kësaj çështjeje, Vuçiç bëri thirrje për një dialog gjithëpërfshirës që në fund të garantojë paqen dhe sigurinë mes shqiptarëve dhe serbëve”, ka thënë Vuçiç.
Një ditë më parë presidenti kosovar Hashim Thaçi sqaroi se korrigjimi i kufijve synonte rishikimin e rreth 400 kilometrave vijë kufitare dhe përfshirjen në territorin e Kosovës, të rajoneve shqiptare të Preshevës, Medvegjës dhe Bujanovcit. Ndërsa ish-kreu i komunës se Preshevës Ragmi Mustafa kërkoi që Lugina t’i bashkëngjitet Kosovës edhe nëse do të duhet që këtij territori ti shkëputen komunat serbe të veriut./TIRANA TODAY/
