Kalimi i Cristiano Ronaldos tek Juventusi akoma nuk ka marrë një konfirmim nga të dyja klubet, por as nga lojtari dhe agjenti i tij. Kjo ka bërë që tifozët të interesohen tek çdo person që mund të jetë në dijeni të kësaj situate.
Së fundmi është Patrice Evra që ka folur rreth kësaj teme, duke i dhënë edhe një këshillë yllit portugez që të largohet nga Real Madrid dhe të shkojë tek Juventus. Ish-mbrojtësi i Manchester United dhe Juventus, Evra, ka shprehur mendimin e tij në Instagram.
“Të gjithë po më pyesin, Pat, çfarë mendon? Nuk kam folur me Cristiano-n për këtë çështje, por këshilla ime është, nëse do të luajë deri më 2050, atëherë duhet të shkojë tek Juve.
Nuk ka asnjë ekip tjetër që duhet t’i bashkohet. Kaq e thjeshtë është. Kështu që Cristiano, bëj zgjedhjen e duhur. Ti e di sa të duan italianët, por është një sakrificë. Po shkove tek Juve duhet të punosh fort. Aq shumë sa do të harrosh pushimet. Por shkove tek Juve, në Botërorin tjetër nuk do të jesh si maskot, por si protagonist!”
