Gjermanët e kritikojnë, Ozil zbulon arsyen pse nuk këndon himnin

Mesut Ozil është kritikuar nga gjermanët si problemi i kombëtares në këtë Botëror dhe më shumë polemikat i ka shtuar fakti që nuk këndon himnin në fillim të ndeshjes. Për këtë arsye ai është akuzuar se nuk e ndjen fanellën që mban veshur. Mesfushori turko-gjerman është vërshëllyer nga tifozët e Gjermanisë pas një foto të bërë me presidentin turk Recep Taip Erdogan.Futbollisti i Arsenalit më në fund ka vendosur që të flasë për çështjen e himnit dhe ka dhënë arsyen pse nuk e bën. Si praktikues i fesë islame, Ozil ka thënë se që kur ishte i vogël gjatë këndimit të himnit ai lutet. “Që kur kam qenë në shkollë fillore kur këndohej himni, unë kam praktikuar të lutem. Edhe tani ndodh e njëjta gjë, nuk e këndoj himnin pasi praktikojë të lutem”, ka thënë Ozil.“Nuk mendoj se është e drejtë të kritikohem për këtë gjë”, u shpreh mesfushori i Arsenalit për ‘TZ’. Ozil është kritikuar edhe për mos angazhim në ndeshjen e parë të Gjermanisë në Kampionatin Botëror kur u mposhtën nga Meksika 0-1. Gjermanët në ndeshjen e ardhshme takohen me Suedinë.