Të paktën 500 kilogramë kanabis janë sekuestruar në cilësinë e provës materiale nga policia në Gjirin e Bristanit, në Karaburun.
Dyshohet se lënda narkotike ka qenë në gomonen 12 metra të gjatë, që u gjet dje e braktisur në zonën e Darzezës në Fier. Skafistët braktisën gomonen sapo panë policinë.
Gomonia është pikasur kur ka hyrë në ujërat tona territoriale, pasi vinte nga Italia në drejtim të brigjeve shqiptare.
Policia kufitare dyshon se ajo do të përdorej për trafik. Po të njëjtat burime shtojnë se policia kufitare e ka ndjekur gomonen për tre orë në det, nga ora 22.00 deri rreth orës 01.00 të mëngjesit të sotëm, e më pas gomonia është braktisur në Darzezë.
Policia pretendon se ka zhvilluar disa operacione të suksesshme, që të parandalojë kultivimin e saj në zonat ku tradicionalisht është kultivuar drogë, e nga ana tjetër droga vijon ende të kapet në sasi të mëdha.
