Armando Sadiku është duke kaluar një moment aspak të mirë në karrierën e tij. Fillimisht ishte tek Legia ku humbi vendin e titullarit dhe u detyrua të largohet drejt Spanjës tek Levante, nga të cilët u quaj si një blerje e goditur. Por u duk qartë që Sadiku nuk arriti të gjejë veten edhe tek spanjollët duke qëndruar në stol dhe në disa raste nuk u grumbullua fare nga trajneri.
Kështu shkruan prestigjiozja spanjolle “Marca” në lidhje me situatën e sulmuesit të Kombëtares Shqiptare, që u transferuar në janar nga Legia e Varshavës te skuadra valenciane. Në analizën e “Marca”-s shkruhet se trajneri Paco Lopez ka një plan për sulmin, por në këtë plan nuk bën pjesë Sadiku, ndaj klubi spanjoll është i gatshëm të dëgjojë ofertat për të.
Boateng dhe Roger janë dy elementët kryesorë të repartit të avancuar ku do të mbështetet trajneri, ndërkohë që kërkohen dhe dy sulmues cilësorë në merkato. Sadiku, që ka firmosur një kontratë të vlefshme deri në vitin 2020 e ka të qartë situatën ku ndodhet, ndaj klubi kërkon ta largojë ose duke e shitur, ose në formë huazimi.
Të ardhmen e Sadikut do ta vendosin ofertat që do të vijnë te Levante për kartonin e tij. Sigurisht nëse nuk ofrohet shuma e duhur, sulmuesi mund të qëndrojë, por qëllimi kryesor i Levantes është të gjejë blerës për të.
