Skënderbeu ka marrë një dënim drastik nga Komisioni i Etikës në UEFA, e cila e përjashton me 10 vite nga pjesëmarrja në kupat e Europës, por edhe me një gjobë prej 1 milionë euro. Bledi Shkëmbi, ish-kapiteni i “Ujqërve të Dëborës” është një ndër lojtarët që ka luajtur në këto ndeshje që janë etiketuar si të trukuara dhe është shprehur se është shokuar nga ky vendim, pasi lojtarët kanë dhënë maksimumin në këto ndeshje. Shkëmbi në një intervistë për “Panorama Sport” është shprehur se Skënderbeu është duke u dënuar pasi është një ekip i vogël në arenën ndërkombëtare.
“Në asnjë mënyrë nuk e besoja se ishte i vërtetë ai dënim prej dhjetë vitesh. Sinqerisht u shokova. Më erdhën në mendje në atë moment shumë gjëra, më vinte më shumë keq për qytetin e Korçës, klubin, por edhe futbollistët. Ai ekip i ka dhënë jetë qytetit të Korçës në gjithë këto vite. Me plot gojën mund të them se i ka dhënë bukuri. Këto akuza që janë bërë nga UEFA nuk qëndrojnë aspak. Jam i bindur gjithashtu se Skënderbeu vuan të qenit i vogël në arenën Europiane dhe kjo ka ndikuar jo pak”, shprehet Skëmbi.
“Nëse KAS do të lerë në fuqi këtë vendim të dhënë nga UEFA, patjetër që kjo do të jetë një humbje e madhe për futbollin, por sidomos për qytetin e Korçës. Për sa i përket presidentit Takaj, se çfarë do të bëjë me të ardhmen, kam përshtypjen se kjo pyetje i takon t’i bëhet vetë atij. Megjithatë, unë shpresoj shumë se KAS do të marrë vendimin në favor të Skënderbeut dhe gjithçka do të shkojë normalisht.
Në fakt, me çfarë kam lexuar, UEFA akuzon për gati 50 ndeshje dhe kjo mendoj se është shumë qesharake. Për këto ndeshje në Europë, unë mbaj mend që ne si futbollistë të Skënderbeut kemi dhënë maksimumin e mundshëm në fushë. UEFA dukshëm mendon se nëse Skënderbeu mundet, atëherë e ka trukuar takimin. Por nëse fiton, si në rastin ndaj Sportingut të Lisbonës në Elbasan me shifrat 3- 0, nuk mendon të njëjtën gjë. Kjo më duket shumë absurde dhe e padrejtë”, përfundon ish-kapiteni.
