Argjentina do të përballet me Italinë në mbrëmje në një miqësore luksi, por lajmi i keq është se Messi nuk do të zbresë në fushë në këtë takim. Stafi i teknikut Sampaoli ka vendosur që të mos rrezikojë “Pleshtin” në këtë ndeshje, pasi forma e tij nuk ishte më e mira në stërvitje dhe ka ndjerë disa shqetësime muskulore.
Nuk është një gjë serioze, por trajneri Sampaoli ka vendosur të mos rrezikojë dhe ka vendosur ta lërë pushim numrin 10, i cili do të zëvendësohet nga i riu Lo Celso, 21-vjeçari i Paris Saint-Germain. Në fillim mendohej se do të ishte Banega, ish-mesfushori i Inter, ai që do të merrte vendin e Leos, por Sampaoli ka vendosur t’i besojë të rinjve në sfidën e sotme.
Pak ditë më parë lojtari i Milanit, Cutrone ishte shprehur se Messin nuk e kishte takuar ndonjëherë dhe se vetëm në playstation ishte përballur me të.
