Tashmë nuk ka më dyshime, Albian Ajeti, vëllai i Arlind Ajetit, që aktivizohet me Bazel pritet të bëjë debutimin e tij me përfaqësuesen e Zvicrës në fund të këtij muaji. Ku Zvicra do të zhvillojë dy miqësoret që ka planifikuar si pjesë të përgatitjeve të saj për Rusi 2018, drejtuar nga Petkoviç.
Faza sulmuese e përfaqësueses së Zvicrës ka shumë pak alternativa dhe kjo ka bindur trajnerin që të eksperimentojë me lojtarët e rinj. Një ndër ta pritet që të jetë edhe Ajeti i cili po kalon një formë mjaft të mirë me ekipin e Bazelit. Me shumë gjasa nëse ai bën paraqitje të mira në dy miqësoret me Greqinë dhe Panamanë që do të përballen zviceranët, mund të jetë “pyka” që i nevojitet Petkoviçit në Botëror.
Sulmuesi i Bazelit është në listën paraprake të Zvicrës U21 për ndeshjet e marsit, por në njoftimin që është shpërndarë ne mediat zvicerane, theksohet se ai do të konfirmohet përfundimisht në të vetëm nëse Petkoviç nuk e grumbullon me ekipin A deri më datë 16 mars, kur të bëhet publike lista zyrtare për ndeshjet ndaj Greqisë dhe Panamasë.
Federata Shqiptare e Futbollit dhe trajneri Christian Panucci i kishin dërguar më parë ftesë për tu bashkuar me kuqezinjtë, por nuk kishin marrë përgjigjen që prisnin. Në një interviste tekniku italian pranoi se Albioni nuk do të bashkohej me kombëtaren shqiptare: “E dimë prej kohësh që nuk do të vijë me ne.”
