PSG ka dështuar edhe këtë vit të ketë ecuri në Champions League, pasi u eliminua nga Real Madrid në 1/8 finale. shumë kritika kanë shpërthyer në drejtim të ekipit parisien, pasi kanë shpenzuar shuma marramendëse dhe akoma nuk kanë një ekip të denjë me të cilin mund të rivalizojnë gjigantët europianë.
Së fundmi ka reaguar edhe ish-numri një i Marseille, Bernard Tapie i cili vë në dyshim modelin sportiv të ekipit parisien, me Nasser Al-Khelaïfi si përgjegjësi maksimal.
“Ata që udhëheqin PSG-në janë krerë të naftës, nuk duhet të punojnë kurrë në këtë mënyrë. Të gjithë fuqinë duhet t’ia japin dikujt, që e di se çfarë është futbolli, i cili vibron për të dhe ka njohuri. Bosi është ai që paguan, emiri i Katarit nuk është pjesë e ekipit, – tha Tapie. – Futbolli është një sport kolektiv, por për PSG-në duket se është një sport individual. Te Real Madridi luajtën edhe lojtarë të rinj, të cilët nuk ishin më të mirët, por ka një kulturë të ekipit dhe gjithkush i përmbahet projektit. PSG-ja, nga njëra anë është Mbappé, në anën tjetër një lojtar tjetër… Ata duhet të jenë plotësues dhe ky rregull nuk është plotësuar te PSG-ja”.
