Milot Rashicanë merkaton e janarit ka bërë lëvizjen e madhe të karrierës së tij, duke kaluar nga Vitesse tek ish-kampionët e Gjermanisë, Werder Bremen. Kosovari i kushtoi më shumë se 7 milionë euro gjermanëve, por duke parë talentin që zotëron do të jetë gjithçka e justifikueshme.
Rashica qëndroi rreth tre vite në Arnhem, ku u kompletua më shumë si futbollist profesionist dhe kjo ka bërë që kjo ndarje të jetë prekëse për futbollistin. Ai ka shkruar një letër të gjatë duke falënderuar të gjithë në klubin e Vitesses por edhe tifozët verdh e zi.
“Unë jam duke i shikuar dy vite e gjysmë të mrekullueshme me të gjithë ju. E mbaj mend ditën time të parë në qytetin e juaj të bukur. Gjithmonë së bashku me shokët e mi me krenari kemi dhënë gjithçka nga vetja për klubin dhe tifozët. Ishte e pabesueshme kur arritëm të marrim Kupën ‘KNVB Beker’, isha shumë i lumtur me të gjithë ju. Werder më kërkuan shumë të luaja me ta dhe më duhej ta merrja një vendim shumë të vështirë.
Qëllimi i një sportisti duhet të jetë për ta arritur maksimumin, aq sa është e mundur. Ardhja e një shansi për të luajtur në Bundesliga me Werder Bremen është thjesht një mundësi e madhe. Unë kurrë nuk do ta harroj se të gjithë ju më keni ndihmuar për të arritur këtu dhe për t’i ndjekur ëndrrat e mija. Këto fjalë janë nga thellësia e zemrës, nuk do ta harrojë kurrë kohën me ju. I uroj skuadrës gjitha të mirat dhe suksese. Ju lutem, më mbani mend mua si njëri nga ju dhe më dëshironi fat për këtë sfidë të re”, ka shkruar reprezentuesi kosovar. Rashica iu bashkua Vitesses në verën e vitit 2013 nga klubi kosovar Vushtrria. Ai në tri vite ka arritur të zhvilloj 100 ndeshje me klubin verdh e zi duke shënuar 13 gola dhe duke bërë 20 asistime.
