Ndikimi i Rusisë në Ballkan tashmë është kuptuar nga të gjithë. Rusia ka bërë përpjekje të organizojë grusht shteti në Mal të Zi. Ajo ka dashur të destabilizojë rajonin duke ndërhyrë edhe në Maqedoni, nëpërmjet ish-kryeministrit Nikolla Gruevski. Kujtojmë këtu dhe marrëdhëniet e mira me Serbinë duke e furnizuar me avionë luftarakë dhe me armatime të tjera të rënda. Edhe në vrasjen e Oliver Ivanoviç, lideri i opozitës serbe Nenad Çanak thotë se “Rusia ka dashur të destabilizojë rajonin dhe kjo është mënyra e duhur për ta bërë, duke nxjerrë jashtë njeriun, i cili ka qenë i njohur për dialogun me shqiptarët“. Çanak thotë se “Ivanoviç ka folur rrjedhshëm shqip dhe ka qenë besnik ndaj kauzës serbe. Ai ka besuar në dialog“.
Të gjithave sa po ndodhin në Ballkan, i ka dhënë përgjigje eksperti amerikan Edward Joseph. Ai shpjegon se BE-ja është e paaftë dhe e pamundur që të largojë Rusinë nga Ballkani. Eksperti e shikon problemin ke SHBA-të. të cilat i kanë lënë shumë në duar BE-së që të merret me Ballkanin kur ajo teorikisht është e pa mundur.
Joseph vlerëson diplomatin amerikan Hoyt Brian Yee, i cili ka qenë shumë energjik në Maqedoni, ku ka ndërmjetësuar zgjidhjen e ngërçit politik. Eksperti thekson se Shtetet e Bashkuara, duke mos qenë të pranishme dhe duke mos qenë mjaftueshëm aktive në Ballkan, duke i lënë shumë në duar Bashkimit Evropian, i kanë krijuar hapësirë Rusisë.
“Mendoj se Shtetet e Bashkuara i kanë lënë shumë në duar Bashkimit Evropian dhe Bashkimi Evropian nuk është në pozitë të ngrihet ndaj ndikimit rus në rajon. Ka pasur disa përpjekje të mira nga diplomatët amerikanë, si Hoyt Brian Yee, i cili ka qenë shumë energjik në Maqedoni, ku ka ndërmjetësuar zgjidhjen e ngërçit politik. Por, medoj se senatori Cardin ka të drejtë në parim. Shtetet e Bashkuara, duke mos qenë të pranishme dhe duke mos qenë mjaftueshëm aktive në Ballkan, duke i lënë shumë në duar Bashkimit Evropian, i kanë krijuar hapësirë Rusisë,” ka thënë Joseph, i cili punon si profesor në Universitetin Johns Hopkins në Uashington.
