Andres Iniesta është një nga lojtarët që është rritur dhe është kthyer një idhull në klubin e Barcelonës. Pas ardhjes së Philippe Coutinho pozicioni i tij në fushë është lëkundur, pasi braziliani luan pothuajse në të njëjtin pozicion. Por këto fjalë janë hedhur poshtë nga ylli katalanas, pasi është shprehur se nuk ka asgjë që e largon atë nga klubi he se është i lumtur për nënshkrimin me Coutinho pasi është një ndër lojtarët më të mirë në qarkullim.
Coutinho është parë si pasardhësi afatgjatë i Iniestas në Barça pas ardhjes nga Liverpooli për 160 milionë euros, por veterani spanjoll siguroi se e ardhmja e tij nuk është e varur nga braziliani. “Unë jam vetëm një lojtar për këtë klub dhe gjithmonë kam thënë se vetëm më të mirët mund të luajnë këtu”, ka thënë fillimisht Iniesta për Onda Cero.
“Kjo e bën Coutinhon një nga më të mirët. Ai është i ri dhe ka një talent të lindur, ndërsa Barcelona është një klub ku ai mund të vazhdojë të rritet. Kjo skuadër, kurrë nuk do të ketë një lojtar që mund të më bëjë të dal në pension ose të më largojë nga këtu. Në moshën 33-vjeçare, kjo nuk është çështje. Coutinho ka ardhur këtu për të na përmirësuar”.
“Jam i lumtur që ai është një nga lojtarët më të mirë në rolin e tij. Ai ka gjërat që na pëlqejnë neve si klub. Ai është një lojtar i shpejtë dhe i aftë, i cili lidh ndeshjen shumë mirë, i përdor të dy këmbët shumë mirë, krijon gola dhe shënon. Ai do të gjejë një mjedis shumë të mirë për tu rritur këtu. Paratë që kemi paguar për të janë një tjetër gjë. Çmimi i tregut vendos se çfarë është vlera e një lojtari. Përtej çmendurisë, duhet të jemi të lumtur që ai është i yni”, përfundoi spanjolli.
