Transferimi i Coutinhos tek Barcelona mund të quhet si lëvizja më e madhe e bërë në një merkato janari. Pasi kjo merkato ka si “moto” forcimin e skuadrës me ndonjë element dhe jo largimin e yjeve. Mungesa yllit brazilian në “Anfield” po ndihet që në këto momente dhe drejtuesit e Liverpool duhet të nxitojnë për të gjetur zëvendësuesin.
Kështu së paku thotë një nga legjendat e klubit, Steven Gerrard, i cili beson se do të jetë e vështirë që të zëvendësohet braziliani i cili pagoi 15 milionë euro nga xhepi i tij për t’u transferuar te Barcelona.
“Si tifoz i Liverpool akoma nuk e kam përtypur këtë largim. Por nuk jam i befasuar sepse e di që Liverpool ka bërë gjithçka për ta mbajtur atë deri në verë. Por, kur një djalosh ka një ëndërr, një latino amerikan, i cili dëshiron të luaj për Barcelonën dhe e sheh këtë si mundësinë e vetme për tu bashkuar me ata, atëherë është e vështirë që ta ndalësh”, shprehet Gerrard.
Kjo lëvizje ka dobësuar ekipin e Liverpool dhe do ta ketë shumë të vështirë për të ruajtur formën dhe rrezikshmërinë. Coutinho ishte një ndër lojtarët kyç të formacionit të Jurgen Klopp dhe zëvendësimi i tij do të jetë shumë i vështirë.
“Nuk ka dyshime për këtë, Liverpoolit do t’i mungojë ai. Ai është futbollist i mrekullueshëm, një njeri i mrekullueshëm dhe të jemi të sinqertë, ai nuk e ka kursyer veten asnjëherë. Unë e respektoj vendimin e tij dhe i dëshiroj të gjitha të mirat”, përfundoi Gerrard. Ai shtoi se Liverpooli mori shumë para nga ky transferim dhe se do të gjejë zëvendësuesin e tij më të denjë.
