Pagliuca: Tare specialist, Strakosha i jep pikë vazhdimisht Lazios

Suksesi i Lazios këtë sezon nuk mund të kalojë pa u komentuar nga legjendat e futbollit. Për këtë sukses meritat janë të ndara, duke filluar nga drejtori teknik Igli Tare, i cili me një buxhet modest ka bërë zbulime të cilat sot kapin vlerën e 100 milionë eurosh dhe janë shumë të kërkuar në tregun e merkatos. Më pas është Inzaghi i cili po bën një punë të mrekullueshme dhe në një kohë mjaft të shkurtër është në listën e trajnerëve më të mirë. Por një meritë e madhe shkon edhe për portierin e kombëtares shqiptare, Strakosha. Ky i fundit ka shkëlqyer me pritjet e tij duke i dhuruar shumë pikë Lazios dhe duke ngjallur interes nga skuadra “big”.

Gianluca Pagliuca në një intervistë për “Radio Incontro Olympia” ka thënë se: “Lazio është padyshim zbulimi i vitit. Merita e rezultateve të tyre duhet ndarë: Inzagi ndoshta nënvlerësohet, por është një prej trajnerëve më të mirë të kampionatit. Më pas vjen Tare, të cilin e njoh shumë mirë sepse ka qenë shoku im i skuadrës te Bolonja për dy vite: ble lojtarë gjysmë-të panjohur të cilët dalin zbulime, si Milinkoviç- Saviç që më pëlqen shumë. Klubi po operon mirë, pra komplimente Lotitos (presidentit) dhe mikut tim Peruci, një person i shkëlqyer”. Pagliuca, aktualisht përgjegjës i portierëve të akademisë së Bolonjës, ka mbetur i mahnitur nga rendimenti i Strakoshës: “Bashkë me Handanoviçin e Alisonin është numri një që sjell më shumë pikë për skuadrën e tij në fund të sezonit”.