Pas dorëheqjes së Nikolla Gruevskit, duket se kandidat për kreun e VMRO-DPMNE-së është vetëm Hristian Mickovski, sekretari i përgjithshëm i kësaj partie.
Në fakt, për postin e liderit të partisë ka pasur dy kandidatura, por është pranuar vetëm ajo e Mickoskit, pasi tjetra është konsideruar nga partia e pavlefshme, është parashtruar pa nënshkrime.
Megjithatë, interesant është fakti që emri i kandidatit të dytë nuk kumtohet nga partia VMRO-DPMNE.
Ndërkohë, kongresi për zgjedhjen e liderit të ri të VMRO-DPMNE-së duhet të mbahet sot dhe nesër në Vallandovë, por teksa gara është thuajse e pavlefshme për shkak se kandidat është vetëm një person, tashmë duket se Mickovski do e fitojë këtë post mjaft lehtë.
Ky i fundit, në profilin e tij në Facebook ka publikuar kandidaturën për kryetar të partisë, teksa shkroi:
“Kjo për mua personalisht është një nga vendimet më serioze në jetë, plotësisht duke e kuptuar peshën, nderin, por edhe përgjegjësinë që të udhëhiqet partia. Asnjëherë në jetë nuk kam ikur nga sfida, ndërsa ky, ndoshta është problemi im më i madh, dhe unë këtë e pranoj. Si njeri mund të zgjidhja të mbetem profesor në fakultetin tim, ose madje të vazhdoj të punoj dhe krijoj në sferën shkencore ku kam kaluar punë shumëvjeçare, por si qytetar i këtij vendi nuk mund të qëndroj indiferent i përditshmërisë së dhimbshme të qytetarëve të Maqedonisë, të nevojave të tyre reale”.
Ndërkohë, Nikolla Poposki, i cili është përmendur si kandidat për lider të partisë, ka dhënë dorëheqje në funksionin anëtar i Komisionit Zgjedhor të VMRO-DPMNE-së.
