Instituti i Trashëgimisë Kulturore dhe Shpirtërore të Shqiptarëve në Shkup ka promovuar një pullë postare me figurën e Faik Konicës, 75 vite nga vdekja e tij.
Pas promovomit, u hap edhe ekspozita e përhershme me figurat e kombit shqiptar, në prag të Kongresit të Manastirit.
Pulla e re postale do të jetë në tirazh prej 6000 ekzemplarësh dhe me vlerë nominale prej 18 denarësh, ndërsa autore e saj është Larisa Zhivkovska-Donev nga Byroja e Filatelisë.
Skënder Asani nga Instituti i Trashëgimisë Kulturore dhe Shpirtërore të Shqiptarëve theksoi se është bërë një punë e madhe bashkë me filatelinë, si organ i brendshëm i postave, teksa shtoi se kjo duhet të jetë shembull edhe për institucionet tjera shtetërore:
“Është një punë kolosale, që institucionalizon historinë, traditën dhe kulturën shqiptare, në këto treva. Dhe do të jetë shembull për shumë institucione tjera se si duhet vepruar, në pozicion që e merr një opozionar, se si duhet punuar”.
Faadis Rexhepi, drejtor i Postave të Maqedonisë u shpreh se pullat postale janë ambasadorë të cilët përfaqësojnë historinë dhe kulturën e kombeve nëpër botë:
“Pullat postale në vetvete ngërthejnë dy komponentë të rëndësishme: e para është me karakter komerical dhe e dyta komponentë jo më pak e rëndësishme, është se përfaqëson medium të llojit të vet, si për operatorin postar, ashtu edhe për shtetin”.
