Televizioni maqedonas TV Nova nuk do të transmetojë më lajme në gjuhën shqipe.
Kështu, mbrëmë ka qenë edicioni i fundit i lajmeve në shqip në këtë televizion maqedonas, pas një viti transmetimi në shqip.
Lajmi bëhet i ditur nga gazetari Zekirja Mexhiti, prezantues i lajmeve në gjuhën shqipe, i cili ka treguar se arsyeja e ndërprerjes së transmetimeve në shqip janë problemet financiare.
POSTIMI I MEXHITIT:
Të dashur miq, ju njoftoj se sonte ishte edicioni i fundit i lajmeve ne gjuhën shqipe në Tv Nova.
Për shkak të problemeve financiare që është duke u përballur muajve të fundit kjo shtëpi mediatike, stafi menaxhues ka vendosur që të ndërpresë transmetimin e lajmeve në gjuhën shqipe.
Gjatë një viti angazhim në këtë television u përballëm me shumë sfida si kriza politike, protesta, dy palë zgjedhje për një periudhë të shkurtër kohore e shumë e shumë sfida tjera, të gjitha këto padyshim se për mua shërbyen si një përvoj shumë e mirë, e sot isha pikërisht unë ai që prezantova edicionin e fundit të lajmeve. E falenderoj stafin menaxhues që morrën guximin të ishin televisioni i parë në gjuhën maqedonase të transmetojnë program në gjuhën shqipe. Gjithashtu u jam shumë mirënjohës kryeredaktores, redaktorëve, stafit teknik dhe gjithë të punësuarve tjerë që besuan tek unë dhe kishin durim të bashkëpunojnë me ne si redaksi ne gjuhën shqipe.
Ju faleminderit edhe juve miq të dashur që na ndoqet dhe ishit me ne gjatë kësaj periudhe.