Mlladen Milinkovic në konferencën për shtyp të mbajtur para ndeshjes me Vllazninë, është shprehur se ekipi i tij do të kërkojë fitoren në këtë ndeshje. Serbi tregon respekt ndaj Gjokës që një vit më parë u shpall kampion me ekipin e Kukësit dhe nuk e sheh fare këtë sfidë si një duel me ish-trajnerin.
“ E rëndësishme është që të grumbullojmë sa më shumë pikë deri në mbylljen e këtij viti. Pasi kemi shumë mungesa dhe me riaftësimin e tyre do të kemi një ekip më të fortë, i cili nuk do të shfaqë luhatje nga java në javë. Sa i përket Gjokës si një ish-trajner i Kukësit, nuk e shoh fare si një duel personal me të, por dëshiroj të fitojmë dhe të marrim tre pikët. Gjoka do të kërkojë të bëjë mirë me ekipin e Vllaznisë. Por ne do ta mirëpresim atë në Kukës, ashtu si më pritën mua në Gjirokastër. Unë kërkoj nga lojtarët e mi që të jenë të përqendruar tek ndeshjet tona dhe të mos presim për dhurata nga kundërshtarët”, është shprehur tekniku Milinkovic.
Kukësi mbanë vendin e dytë aktualisht në kampionat, me tre pikë më pak me kryesuesit e Skënderbeut. Ish-kampionët e Superiores edhe këtë vit do të kërkojnë të ruajnë titullin por do ta kenë mjaft të vështirë, pasi korçarët kanë treguar një nivel mjaft të lartë dhe i kanë mposhtur të gjithë kundërshtarët në sfidat direkte.
