Kombëtarja e 17 vjeçarëve ka bërë një mbyllje dinjitoze eliminatoreve të evropianit “Angli 2018”. Pas dy humbjeve me rezultat minimal 0-1 ndaj Spanjës dhe Kroacisë, kuqezinjtë e vegjël gjejnë fitoren e thellë 5-0 ndal Lihtenshteinit, por nuk ia dalin të kualifikohen për më tutje. Ndeshja u luaj në “Selman Stermasi’, ku formacioni i Mustedaganic u konfirmua se ka një sulm të frikshëm, që mund të kenë një të ardhme të madhe. Ka qenë Bozhanaj më i miri i ndeshjes, që ka arritur të gjejë tre herë rrugën e rrjetës në këtë sfidë.
Është pikërisht Kleis Bozhanaj që në minutën e 10’ ka arritur të gjejë rrugën e rrjetës pas një gabimi të portierit kundërshtar. Në minutën e 21’ është sërish ai që dyfishon rezultatin, falë një aksioni personal mjaft të bukur. 3’ minuta më vonë është mesfushori i Olympiacosit, Rama që gjen rrugën e rrjetës dhe çon në 3-0 rezultatin. Pjesa e parë ka rezervuar edhe një gol tjetër për kuqezinjtë dhe është kapiteni Bullari që gjen rrugën e rrjetës në minutën e 33’, për të vulosur rezultatin e pjesës së parë. Pjesa e dytë fillon me të njëjtin intensitet loje nga të tanët, që arrijnë të gjejnë edhe golin e 5 me anë të Bozhanajt në minutën e 50’.
Një tregolësh për Bozhanajn dhe një paraqitje fantastike në fushën e lojës. Rastet nuk munguan edhe në vazhdim, por rezultati ngeli i pandryshuar. Kjo ishte një fitore mjaft e bukur e të vegjëlve kuqezi, por mungesa e fatit në dy ndeshjet e para bëri që të s’kualifikohet padrejtësisht nga ky turne.
